Fréttir
Lausnir fyrir lántakendur – Fundaröð félags- og tryggingamálaráðherra
Félags- og tryggingamálaráðherra heldur 10 borgarafundi víðs vegar um landið á næstunni þar sem hann fjallar um skuldastöðu heimilanna, kynnir úrræði og svarar fyrirspurnum. Á fundunum verða starfsmenn Ráðgjafarstofu um fjármál heimilanna til viðtals.
Árni Páll Árnason, félags- og tryggingamálaráðherra, stendur á næstu vikum fyrir 10 borgarafundum sem haldnir verða víðs vegar um landið. Árni Páll mun fjalla um skuldastöðu heimilanna, kynna helstu úrræði og svara fyrirspurnum.
Ráðist hefur verið í margvíslegar aðgerðir til að mæta erfiðleikum einstaklinga og fjölskyldna sem eiga í fjárhagsvanda. Auk þess að kynna fyrirliggjandi úrræði mun ráðherra gera grein fyrir aðgerðum sem boðaðar hafa verið og felast m.a. í bættri löggjöf um skuldaaðlögun, stofnun umboðsmanns skuldara, verulegum úrbótum á stöðu fólks með erlend bílalán og aðgerðum í húsnæðismálum.
Lögfræðingur og ráðgjafi frá Ráðgjafarstofu um fjármál heimilanna verða til viðtals á öllum borgarafundunum.
